ကိုရိုနာဗိုင်းရပ်စ် အကြောင်း ပုသိမ်ဆေးရုံအုပ်ကြီးဒေါက်တာသန်းမင်းထွဋ် ပြည်သူတွေကိုအသိပေးပြီ။

မိသားစု တစ်စု။
ရွှေသောင်ယံ ကမ်းခြေအတွင်းက ရွာတစ်ရွာမှာ နေပါသည်။
တောကောင်လေးများ ဖမ်း၊ တောထဲ တောင်ထဲက သစ်လေး ဝါးလေး ယူ၊ မီးသွေးဖုတ် ရောင်းပါသည်။
မီးသွေးဖုတ်တာဆိုတော့ လေထုကလည်း မသန့်ရှင်းပါ။
အမေဖြစ်သူ ဖျားတာ တစ်လကျော် ကြာပါသည်။
အဖေ ဖြစ်သူကလည်း ချောင်းဆိုးပြီး ဖျားပါသည်။ ၁၅ ရက် ကျော် ကြာနေပါပြီ။
သူတို့ခမျာ နိုင်ငံခြားသွားဖူးဖို့ နေနေသာသာ၊ တောထဲမှာ နေသူဖြစ်လို့ မြန်မာစကားပင် မပြောတတ်ရှာပါ။ ကရင် တိုင်းရင်းသားတွေကိုး။
သူတို့ရွာကိုလည်း နိုင်ငံခြားသားများ လာလေ့မရှိပါ။ လာရောက်ဖူးခြင်းလည်း မရှိပါ။
တစ်လကျော်ကြာ တစ်ရှောင်ရှောင် ဖျားသော အမေသည် ရွှေသောင်ယံ ဆေးရုံမှာ ဆေးကုရင်း ကွယ်လွန်ပါသည်။

pneumonia အဆုပ်ရောင် ရောဂါ ဟု သိရပါသည်။
အမေ ဆုံးတော့ တိုက်နယ်ဆရာ၀န်လေးက ဖျားနေသော အဖေနှင့် သားအကြီးကို ပုသိမ်ဆေးရုံသို့ လွှဲပါသည်။
ပုသိမ်ဆေးရုံမှာ သူတို့ကို စစ်ဆေးကြည့်တော့ Broncho Pneumonia ဟု အဖြေ ထွက်ပါသည်။
သွေးစစ်တော့ Widal Test (+) ထွက်ပါသည်။ အူရောင်ငန်းဖျား စစ်ခြင်း ဖြစ်ပါသည်။
ချောင်းဆိုး လူနာဆိုတော့ ဘေးလူနာတွေကို ကူးမှာစိုး၍ သီးသန့်ထားပေးပါသည်။

ဒါကို fb မှာ ပုသိမ်ဆေးရုံတွင် ဝူဟန်လူနာ ရောက်ပြီဟု တင်ပါသည်။
ပြည်သူတွေ စိုးရိမ်ကြ၊ သတင်းထောက်တွေ လာမေးကြ။
ပြည်သူများ သိသင့်သော သတင်းကို ကျွန်တော် ဘယ်သောအခါမှ ထိမ်ချန်ထားလိမ့်မည် မဟုတ်ပါ။
ပြည်သူတို့ အသက်အန္တရာယ်ကို ကာကွယ်ရန် ဝူဟန် လူနာ ရှိပါက ကျွန်တော် သတင်းပေးပါမည်။
ပြည်သူတွေ ဝူဟန်ကို စိတ်ပူနေကြသည်ကို နားလည်ပါသည်။
သတင်းမှားများ၊ ကောလဟလများကို မယုံကြည်ကြစေလိုပါ။
ပြည်သူတို့နှင့်အတူ ပြည်သူ့အကျိုးကို ကာကွယ်ရန် ပုသိမ်ဆေးရုံ၀န်ထမ်းများ တာ၀န်ထမ်းဆောင်လျက် ရှိပါသည်။
အားလုံး ကျန်းမာ ချမ်းသာ ကြပါစေ။

ပုသိမ်သို့ ပြောင်းရွေ့လာသော ပင်းတယရဲ့ မီးအိမ်ရှင်ဟုနာမည်ကြီးသည့် ဒေါက်တာသန်းမင်းထွဋ်သည် လတ်တလော ပုသိမ်မြို့တွင် ဝူဟန်ဗိုင်းရပ်စ် ရောဂါ သတင်းနှင့်ပတ်သတ်၍သတင်းအမှားများကိုမယုံကြဖို့သူ၏ဖေ့ဘွတ်ခ်စာမျက်နှာမှဝေမျှခဲ့တာပါ။

ကဲ ဒါဆိုရင် ဝူဟန်ဗိုင်းရပ်စ်အကြောင်း တွေးမကြောက်တွေးမပူကြဖို့နဲ့ ဝူဟန်ဗိုင်းရပ်စ် သတင်းမှန်ကိုသိဖို့ ဆရာ့ရဲ့ အ‌သိပေးမှုလေးတွေ တစ်ဆင့်မျှဝေပေးကြရအောင်နော်။